Policia e Kosovës ka njoftuar se ka pasur parregullsi në tenderin e hapur për furnizim me uniforma të policisë.
Pas hetimit që sipas policisë, ka zgjatur rreth dy muaj nga hetuesit policorë të Drejtorisë për Hetimin e Krimeve Ekonomike dhe Korrupsionit (DHKEK), janë gjetur dëshmi se tre operatorë ekonomikë e kanë kryer veprën penale “keqpërdorimi dhe mashtrimi në prokurim publik”.
Ky rast sipas komunikatës së policisë do të dërgohet në prokurori.
“Rasti karshi veprës penale ‘keqpërdorimi dhe mashtrimi në prokurim publik’ është iniciuar, janë siguruar dëshmi që së bashku me kallëzimin penal do të dërgohen në prokurori”, thuhet në komunikatë.
Policia e Kosovës nuk i ka bërë të ditur emrat e operatorëve ekonomikë të cilët dyshohet se kanë kryer vepër penale në lidhje me tenderin e uniformave të policisë.