Tashmë zgjedhjet e parakohshme po përmenden thuajse në çdo deklarim të figurave politike.
Të gjitha partitë politike, në pushtet dhe opozitë kanë dhënë versionin e tyre.
Sipas njohësve të çështjeve politike në vend, interes për mbajtjen e zgjedhjeve ka edhe pushteti.
Sipas Shkodran Ramadanit, Vetëvendosje po mundohet të fsheh dështimet e veta përmes shkuarjes në zgjedhje.
“Konsideroj dhe besoj që është e dukshme që LVV ka dështuar si në aspektin politik, ekonomik e juridik dhe dëshira për zgjedhje për ta amartozu pakënaqësinë e qytetarëve me përformancën e Lëvizjes Vetëvendosje në Qeveri pra në krye të shtetit”, tha Shkodran Ramadani, analist.
E, Faton Ismajli beson se zgjedhjet e parakohshme do t’i bënin mirë vetëm partisë në pushtet.
“Lëvizja Vetëvendosje i kërkon zgjedhjet tash për të mos u thelluar shumë në kompromise, për të mos e zbatuar Asociacionin tash dhe mendoj që LVV i kërkon zgjedhjet edhe për shkak të zgjedhjeve që do të mbahen në Amerikë”, tha Faton Ismajli.
Në emër të LVV-së, kryeparlamentari Glauk Konjufca ka deklaruar se shumica parlamentare nuk ka vullnet që vendi të shkojë në zgjedhje me dorëheqje të Qeverisë.
Kurse kryeministri Albin Kurti është deklaruar i gatshëm që t’i ndihmojë opozitës duke i ofruar nënshkrimet e deputetëve të partisë së tij, të nevojshme për ta shpërbërë Kuvendin.
PDK ka paralajmëruar se ditëve në vijim do të iniciojë këtë kërkesë, derisa LDK dhe AAK kanë dilema për mënyrën se si duhet të shkohet deri te zgjedhjet.