Këshilltari i zëvendëskryeministrit të Kosovës Besnik Bislimi, Klisman Kadiu ka thënë se termi “personat e zhdukur me dhunë” është përfshirë në Deklaratën për të Zhdukurit nga lufta e fundit në Kosovë.
Me anë të një postimi në Facebook, Kadiu ka deklaruar se tashmë, pritja për fatin e personave të zhdukur me dhunë duhet të marrë fund.
“Pas dakordimit final, publikohet Deklarata për Personat e Zhdukur. Në deklaratë, në paragrafin e dytë, theksohet: “Duke patur parasysh që kjo Deklaratë ndjek kuptimin e ICRC për Personat e Zhdukur, i cili përfshin personat e zhdukur me dhunë”. Pra, termi personat e zhdukur me dhunë, është i përfshirë në deklaratë, ashtu siç është shprehur edhe së fundmi, pas takimit të 4 prillit, atëherë dhe kur u arrit ky dakordim në takimin e kryenegociatorëve. Pritja e gjatë dhe e padrejtë për fatin e personave të zhdukur me dhunë duhet tashmë të marrë fund”, ka shkruar ai.
Kryeministri i Kosovës, Albin Kurti, dhe presidenti i Serbisë, Aleksandër Vuçiq, miratuan Deklaratën për të Zhdukurit nga lufta e fundit në Kosovë raporton Radio Evropa e Lirë.
Kjo, njëherësh, ishte edhe pika e parë e rendit të ditës në takimin që po zhvillojnë në Bruksel, me ndërmjetësimin e zyrtarëve të Bashkimit Evropian.
BE-ja ka publikuar dokumentin e plotë të deklaratës për të Zhdukurit gjatë luftës së fundit në Kosovë që është nënshkruar në takimin në Bruksel në mes të kryeministrit të Kosovës, Albin Kurti dhe presidentit të Serbisë, Aleksandër Vuçiq.
Në deklaratën e BE-së thuhet se puna do të mbikëqyret nga një Komisioni i Përbashkët që do të kryesohet nga BE-ja dhe do të mbikëqyret nga Kryqi i Kuq.
Po ashtu është kërkuar qasje e plotë në të gjithë dokumentet, incizimet dhe vende të tjera ku mund të ketë informacione për ta bërë sa më të lehtë gjetjen e të zhdukuruve nga periudha 1 janar 1998 deri më 31 dhjetor 2000.