Gjatë kësaj jave, Kuvendi i Kosovës do t’i mbajë tri seanca parlamentare.
Kështu ka bërë të ditur shefja e Grupit Parlamentar të VV-së, Mimoza Kusari Lila, pas përfundimit të mbledhjes së kryesisë.
Kusari-Lila ka thënë se të enjten do të mbahen dy seanca, ku në rend dite do të jenë marrëveshjet ndërkombëtare.
“Nga mbledhja e rregullt e Kryesisë me Grupet Parlamentare u dakorduam që për këtë javë Kuvendi të mbajë tri seanca plenare. E para është të mërkurën e cila do të vazhdojmë me seancën e papërfunduar. Ditën e enjte seanca e re është në ora 10:00, plotësim-ndryshimet e Kushtetueses sa i përket Vettingut. Vazhdon seancë tjetër të enjten në ora 10:30, vazhdohet me votimin e marrëveshjeve ndërkombëtare”, ka deklaruar ajo.
E sa u përket marrëveshjeve ndërkombëtare, ajo ka deklaruar se PDK-ja nuk ka ndryshuar qëndrim.
“Sot është diskutuar shkurt çështja e votimit në seancë të marrëveshjeve ndërkombëtare, LDK-ja dhe AAK-ja do t’i votojnë”, ka shtuar ajo.
Ndërsa, të shtunën do të ketë seancë solemne për nder të 16-vjetorit të pavarësisë së Kosovës.