Anëtari i Komisionit Qendror të Zgjedhjeve (KQZ), Arianit Elshani, ka thënë se nuk ka asnjë udhëzim që KQZ-ja u ka dhënë KKZ-ve për moslejimin e xhirimit brenda qendrave të votimit, dhe se mediave u lejohet xhirimi deri te kabinat e votimit.

Ishte gazetarja e Dukagjinit, Anduena Bajqinofci, e cila raportoi se nuk iu lejua transmetimi brenda pikave të votimit, ndërsa nga jashtë lejohej me 5 metra distancë nga qendra.

Në një edicion special informativ të RTV Dukagjinit për zgjedhjet në veri, Elshani ka thënë se një gjë e tillë është e papranueshme.

“Ajo që po ndodh është tërësisht e papranueshme, është në kundërshtim me ligjin për zgjedhjet e përgjithshme dhe në kundërshtim me rregullën që përcakton çështjen e monitorimit nga ana e vëzhguesëve medialë të mediave, sepse të gjithëve u lejohet hyrja, dhe në këtë rast, mediave që të marrin pamjet e vendvotimit…Nuk ka udhëzim që KQZ-ja u ka dhënë KKZ-ve, tërisht e pavërtetë dhe e papranueshme”, ka thënë ai.

Ndër të tjera, Elshani ka thënë se mediave u lejohet të marrin pamje deri te kabina e votimit.

E diela e 23 prillit është data kur do të mbahen zgjedhjet e jashtëzakonshme për kryetarë të komunave në Mitrovicën e Veriut, Zubin Potok, Leposaviq dhe Zveçan.

Nga 44 sa kanë qenë në të kaluarën, kësaj radhe do të jenë 19 qendra votimi, ku shumica prej tyre do të improvizohen në kontejnerë.

Numri i përgjithshëm i qendrave të votimit në këto katër komuna është 19, me gjithsej 34 vendvotime, prej tyre 6 janë qendra votimi të rregullta, me gjithsej 6 vendvotime, ndërsa 13 qendra të tjera votimi janë alternative, me gjithsej 28 vendvotime.

Që të tri komunat, Mitrovica e Veriut, Leposaviqi, Zveçani dhe Zubin Potoku, kanë mbetur pa kryetarë të komunave që nga nëntori i vitit të kaluar. Kjo pasi serbët braktisën institucionet e Kosovës për shkak të vendimit të Qeverisë së Kosovës për riregjistrimin e makinave me targa serbe.

Në garë për kryetarë të këtyre komunave janë 10 kandidatë nga tri subjekte politike, prej të cilave, vetëm një nga komuniteti serb.