Ushtruesi i detyrës i Organizatës së Veteranëve të Luftës së UÇK-së, Faton Klinaku, ka njoftuar se të martën e 14 qershorit, do të mbahet seanca e Kuvendit të Kosovës, dhe sipas tij, pikë e rendit të ditës është përsëri miratimi i projektligjit për ndryshimin e ligjeve.
Ai përmes një postimi në Facebook, ka thënë se me anë të këtij ligji, ky pushtet po dëshiron që t’i largojë veteranët e luftës nga lidhja me pagën minimale.
Megjithatë, ka theksuar se nuk mund të organizojnë protestë për nesër, sepse është kohë e shkurtër.
“Mos e miratoni ligjin diskriminues ndaj kategorive të luftës, sepse do t’i bartni pasojat edhe ju, sikur qeveria”, ka shkruar Klinaku.
Sipas tij, nëse ky pushtet e ndryshon ligjin, atëherë do të realizohet edhe protesta.
“Nëse ky pushtet e ndryshon ligjin, ne ju thërrasim për protestë, ku do të qëndrojmë aty deri në realizimin e të drejtave tona”, ka shtuar ai.
Ai u ka bërë thirrje deputetëve të pozitës e opozitës, që të mos miratohet ligji diskriminues ndaj kategorive të luftës, sepse siç thotë ai “do t’i bartni pasojat edhe ju, sikur qeveria”.
“Dyfytyrësia e Glauk Konjufcës! Në njërën anë futet në rend dite projektligji kundër veteranëve, e në anën tjetër shkon t’i vizitojë veteranët që gjenden në paraburgim në Hagë”, ka përfunduar Klinaku.
Ndryshe, më gjashtë qershor, organizatat e veteranëve të luftës kanë mbajtur protestë, për t’i shfaqur pakënaqësitë në lidhje me largimin e tyre nga rritja e pagës minimale.