“…Më parë e vras Albin Kurtin sesa që ia lëshoj rrugën e iku nga Kosova” – janë fjalët që ka shkruar ushtruesi i detyrës së kryetarit të Organizatës së Veteranëve të Luftës së Ushtrisë Çlirimtare të Kosovës (UÇK), Faton Klinaku, para disa ditësh.
Më pas, ai është intervistuar nga Prokuroria Speciale, lidhur me deklaratën e tij për kryeministrin Albin Kurti, e cila u vlerësua si kërcënim ndaj tij.
Pas kësaj deklarate, sot ai ka bërë një reagim sërish në Facebook, duke mohuar deklaratën e tij.
“Koncentrohuni, mos folni budallallëqe”, ka shkruar ai, teksa ka bërë një analogji me thënien popullore, “E pres dorën e nuk vjedh”!
“A mos e kam kërcënuar dorën time!? I kërkoj falje publikut të gjerë që e kam vlerësuar aq lart një njeri që nuk e meriton vlerësimin tim”, ka vijuar ai.
Po ashtu, në lidhje me kanosjen me vrasje ndaj kryeministrit Kurti, të enjten është arrestuar edhe një person.
Prokuroria Speciale njofton se i dyshuari N.S. ka bërë “kanosje të dhunës për vrasje ndaj kryeministrit të Kosovës, pasi ka bërë një postim në rrjetin social ‘Facebook’ me përmbajtje inkriminuese, si dhe gjatë transmetimit të drejtpërdrejtë të emisionit ‘DEBAT PLUS’, të datës 30 gusht 2023, të njëjtën deklaratë i njëjti e përsërit”.
N.S në emisionin “Debat Plus” të RTV Dukagjinit kishte deklaruar se “kush bën keq sikurse Albin Kurti, duhet të vritet”.
Me aktvendim të Prokurorisë Speciale, i njëjti është ndaluar për 48 orë.