“Faleminderit Beko, i grahim përpara”…
Kritikat që ia kishte bërë Përparim Ramës gjatë fushatës për rundin e parë të zgjedhjeve, në humor i ktheu sot kandidati i AAK-së, Bekë Berisha, dhe kështu bëri të ditur se do ta përkrah pikërisht kandidatin e LDK-së në balotazh.
Më shumë detaje nuk u dhanë nga asnjëra parti rreth kësaj marrëveshje.
Megjithatë, Lidhja Demokratike mbetet afër zyrtarizimit të një bashkëpunimi edhe me një tjetër subjekt.
”Jemi shumë afër finalizimit të marrëveshjes për bashkëqeverisje me Lidhjen Demokratike”, ka thënë Endrit Zabërgja – Kandidati për asamblist nga Nisma Socialdemokrate.
Ndërkohë, siç merr vesh televizioni Dukagjini nga burime të afërta me zhvillimet, PDK-ja si partia më e madhe jashtë balotazhit, ka pasur ofertë për bashkëpunim sikurse nga VV-ja ashtu edhe nga LDK-ja.
Por, Besiana Musmurati tha se nuk ka asnjë zhvillim konkret e marrëveshje.
”Për besë, s’kemi qëndrim. Kur të kemi e publikojmë për të gjithë. S’kemi diskutuar ende. Ne kemi humb kështu që tash vendosin qytetarët, për koalicione është hala shumë herët”, ka thënë Besiana Musmurati – PDK.
Ndërkohë, Lëvizja Vetëvendosje, që garon në balotazh në kryeqytet me kandidatin e vet Hajrulla Çeku, nuk është përgjigjur për mundësitë e bashkëpunimeve për 9 nëntorin.
Për monitorues të komunave, pavarësisht koalicioneve të arritura, një subjekt luan rol më të rëndësishëm sesa të tjerët.
”Partia Demokratike është përcaktuesi i fituesit në Prishtinë dhe mendoj që më e natyrshme do të ishte sikur PDK dhe LDK të arrinin një marrëveshje për të shkuar në mbështetje të kandidatit të LDK pavarësisht se e dimë që ka pasur vërejtje për Ramën…”, ka thënë Shemsi Jashari – Monitorues i komunave.
Raundi i dytë për zgjedhjet lokale mbahet më 9 nëntor ndërkohë në Prishtinë i pari doli Përparim Rama i LDK-së me vetëm 518 vota më shumë se Hajrulla Çeku i VV-së, të cilët synojnë të udhëheqin me kryeqytetin e Kosovës.