Avokati Arianit Koci ka njoftuar se ka depozituar në Gjykatën Kushtetuese njoftimin për moszbatimin e aktgjykimit në rastet KO256/26 dhe KO258/26, lidhur me procedurën për zgjedhjen e Presidentit të Kosovës, raporton Ekonomia Online.
Koci ka thënë se Gjykata Kushtetuese kishte përcaktuar që procedura për zgjedhjen e Presidentit duhej të përfundonte deri më 6 tetor 2026.
Sipas tij, votimi ka vazhduar edhe pas mesnatës, duke mos respektuar afatin e përcaktuar nga Gjykata Kushtetuese.
“Sot kam depozituar në Gjykatën Kushtetuese njoftimin për moszbatimin e aktgjykimit në rastet KO256/26 dhe KO258/26. Gjykata kishte përcaktuar qartë se procedura për zgjedhjen e Presidentit duhej të përfundonte deri më 6 tetor 2026. Sipas të dhënave publike, votimi ka vazhduar edhe pas mesnatës”, ka deklaruar Koci.
Ai i është referuar edhe nenit 226 të aktgjykimit, duke thënë se aty përcaktohet pasoja juridike në rast të mosrespektimit të afatit.
“Gjykata në nenin 226 të aktgjykimit, e ka theksuar edhe pasojën juridike në rast se afati nuk respektohet: shpërndarja e Kuvendit. Vendimet e Gjykatës Kushtetuese janë të detyrueshme. Pa zbatimin e tyre, nuk ka shtet e shoqëri”, ka thënë Koci.