Komandanti i trupave të KFOR-it, Angelo Michele Ristuccia ka vlerësuar se zgjidhja e vetme për situatën në veri të Kosovës mbetet një zgjidhje politike, jo ushtarake.
Siç raporton Reuters, komandanti i trupave të udhëhequra nga NATO në territorin ballkanik deklaroi se Kosova mbetet “shumë e paqëndrueshme”.
Krahas kësaj, ai vlerësoi se tensioni midis dy palëve mbeti i lartë për shkak të mosmarrëveshjeve politike.
“Situata është e qetë pas ngjarjeve të 29 majit. Por, në një farë mënyre, situata është ende shumë e paqëndrueshme. Ne e perceptojmë tensionin – tensionin për shkak të … morisë së çështjeve të pazgjidhura,” u tha ai gazetarëve në Selinë e NATO-s në Bruksel. “Nëse duhet të bëjmë një diagnozë të asaj që po ndodh, do të thoja se sëmundja më shqetësuese është mosbesimi – mosbesimi midis palëve,” shtoi ai.
“Kjo do të thotë se nuk ka një zgjidhje ushtarake. Zgjidhja e vetme është një zgjidhje politike.”
Më shumë se 90 ushtarë paqeruajtës të NATO-s u plagosën në përleshjet me protestuesit serbë në veri të Kosovës, sipas NATO-s.
Rreth 50 protestues u plagosën gjithashtu.
Përplasjet shpërthyen pasi kryetarët shqiptarë morën detyrën në veri pas zgjedhjeve lokale të cilat u bojkotuan nga serbët lokalë.