Komisioni Disiplinor ka marrë vendimin që ta largojë nga shërbimi civil, Nexhat Krasniqin, i sanksionuar nga Departamenti amerikan i Shtetit.
Këtë e ka konfirmuar ministri i Mjedisit, Planifikimit Hapësinor dhe Infrastrukturës, Liburn Aliu, në një konferencë për media.
“Sot kemi marrë informacione se Komisioni Disiplinor ka marrë vendim për rastin e Nexhat Krasniqit, meqë rast, vendimi është heqje nga shërbimi civil”, ka thënë Aliu.
Më 3 nëntor të këtij viti, Departamenti amerikan i Shtetit ka vendosur në listën e sanksioneve Nexhat Krasniqin, ish-drejtorin e Departamentit të Prokurimit në Ministrinë e Tregtisë dhe Industrisë, për shkak të përfshirjes në korrupsion të madh.
Ai edhe pas këtij vendimi të DASh-it ishte kthyer në pozitën e drejtorit të Departamentit të Infrastrukturës Rrugore me vendim të ministrisë që udhëheq Aliu.