Ankesa e FC Prishtinës për ndeshjen ndaj Gjilanit nuk është marrë parasysh nga Komisioni i Garave i Federatës së Futbollit të Kosovës (FFK).
Komisioni i Garave i FFK-së të martën ka marrë vendim që të gjitha ndeshjet e xhiros së 34-të të Superligës së Kosovës në futboll, të regjistrohen me rezultatet e arritura në fushë, përfshirë ndeshjen Prishtina – Gjilani, e cila ka përfunduar me rezultat 1:2.
Skuadra nga kryeqyteti kishte kërkuar që ky takim të regjistrohet me rezultat zyrtar 3:0 në favor të saj.
Kjo për shkak se sipas tyre, Gjilani e ka aktivizuar futbollistin Armend Thaqi, pa të drejtë loje.
Thaqi ishte ndëshkuar me karton të kuq direkt në ndeshjen e xhiros së 32-të ndaj Feronikelit 74. Ai ishte dënuar me dy ndeshje moslojë nga Komisioni Disiplinor dhe Etikës i FFK-së.
Sipas këtij vendimi, Thaqi nuk ka pasur të drejtë të inkuadrohet në takimin ndaj Prishtinës.
Nga FFK nuk kishte pasur asnjë njoftim nëse Thaqit i është zbutur dënimi nga dy në një ndeshje moslojë, e sipas ankesës të klubit, të cilën e ka parë TV Dukagjini, këtë nuk e dinte as delegati i ndeshjes Prishtina – Gjilani.
Sipas nenit 55, pika 55.10, të Rregullores së Garave të Superligës dhe Kupës së Kosovës, për edicionin 2024/2025, “Kur lojtari merr direkt karton të kuq, nuk luan në dy (2) e më shumë ndeshje pasardhëse në të gjitha garat.”
TV Dukagjini ka kontaktuar kryetarin e Komisionit të Garave të FFK-së, Abdyl Bellopoja, por i njëjti nuk ka pranuar të flasë për këtë çështje.
“Veç munesh në Zyrën për Informim në Federatë. Faleminderit, tung e bofshi”.
Televizioni ka dërguar edhe pyetje në adresë të Zyrës për Media të FFK-së, megjithatë as nga aty nuk kanë kthyer përgjigje.
Kjo zyrë nuk kthen përgjigje tash e njëkohë të gjatë në pyetjet e TV Dukagjinit.
Ndërkohë, Gjilani triumfoi të dielën në stadiumin “Fadil Vokrri” kundër Prishtinës, me rezultat 1:2, në ndeshjen e vlefshme për xhiron e 34-të.
Aktualisht, “Skifterat” renditen në pozitën e katërt në tabelë me 49 pikë.
Teksa, Prishtina është e shtata me 44 sosh.