Drejtoria për Shëndetësi dhe Mirëqenie Sociale dhe drejtoria e QKMF-së kanë marrë vendim për zgjatje të orarit të punës dhe mbajtjen e kujdestarisë në Ambulancat e Mjekësisë Familjare në katër rajonet e komunës së Gjakovës.
Në fshatrat Ponoshec, Rogovë, Skivjan, e Cermjan do të punohet nga ora 08:00 deri në 20:00 kurse në të gjitha qendrat në qytet sipas orarit 07:00 e mëngjesit deri në orën 21:00.
Kjo me qëllim të ofrimit të shërbimeve sa më efikase e për të qenë sa më afër qytetarëve thotë Adelina Shehu, drejtoreshë e shëndetësisë në këtë komunë.
“Rritet numri i frekuentimit të pacientëve, gjatë verës edhe për shkak të temperaturave të larta, po që katër rajonet i lajmë me një orar më të zgjatur, përveç kësaj edhe të shtunën edhe të dielën i lajmë të hapur”, deklaroi Adelina Shehu, drejtoreshë për Shëndetësi dhe Mirëqenie Sociale në Gjakovë .
Shehu thotë që kështu veprohet tash e tri vite, dhe nuk kanë problem me stafin.
“Është vjet për vjet që e bojmë, menaxhohet lehtë , është fal edhe drejtorit të QKMF-së, është si menaxher, në qershor e kemi përpilu orarin që mos me pas problem”, deklaroi Adelina Shehu, drejtoreshë për Shëndetësi dhe Mirëqenie Sociale në Gjakovë .
Ndërkaq, Arben Koshi, drejtor i QKMF-së thotë se edhe pse kanë dërguar mjekët nëpër fshatra është një numër i vogël i pacientëve.
“Është vërejt një numër i vogël, i vizitave bile kemi raste edhe pse mjeku shkon në fshat ose stomatologu, prapë kemi lëvizje nga pacientët që vinë nga fshati të kërkojnë shërbimet në qytet’, deklaroi Arben Koshi, drejtor i QKMF-së.
Pas orës 21:00 qytetarët mund të marrin shërbime në urgjencën e qytetit, ndërkohë Koshi bënë thirrje për kujdes sidomos në periudhën e temperaturave të larta që po mbizotërojnë në vend.