Komuna e Prishtinës ka njoftuar të gjithë shitësit të cilët operojnë çdo të diele në hapësirat publike, në trotuare dhe rrugë, në afërsi të “TREGUT TË AUTOMJETEVE” në Zonën Industriale të Kryeqytetit në magjistralen Prishtine – Fushë Kosovë, se të njëjtit duhet të lirojnë këto hapësira me qëllim që të shfrytëzohen për çfarë janë të destinuara.
Përmes një njoftimi, bëhet e ditur se ky aksion nga Komuna e Prishtinës pritet të fillojë të dielën, nën asistencën e Policisë së Kosovës.
Hapësirat që duhet të lirohen në afërsi të “TREGUT TË AUTOMJETEVE” në Zonën Industriale të Kryeqytetit përfshijnë rrugët dhe trotuaret si në vijim:
Rruga Dervish Çollaku
Rruga Epiri
Rruga Aziz Abrashi
“Luten të gjithë shitësit që përgjatë kësaj periudhe të bëjnë zgjidhje të ligjshme duke u sistemuar brenda ambienteve zyrtare të Tregut të automjeteve, për shkak se pas datës së cekur më lartë, në asnjë mënyrë nuk do të lejohen të operojnë jashtë ambienteve të Tregut dhe në hapësira të cilat janë të destinuara për qarkullimin e automjeteve dhe të këmbësorëve”, shkruan në njoftimin e Komunës së Prishtinës.
Ndër të tjera, bëhet e ditur se ky aksion vie si një vazhdimësi e aksioneve të mëhershme të cilat ndërlidhen me sistemimin e shitësve ambulantë brenda hapësirave të përcaktuara si tregje.