Asociacioni i Komunave të Kosovës (AKK), ka njoftuar se komunat janë duke e shqyrtuar mundësinë që ta padisin Ministrinë e Arsimit, Shkencës, Teknologjisë e Inovacionit (MASHTI) dhe Ministrinë e Shëndetësisë (MSH).
Sipas AKK-së, edhe pse kontratat kolektive janë nënshkruar nga këto dy ministri, mbulueshmërinë financiare po detyrohen ta paguajnë komunat.
Këto shpenzime, sipas AKK-së po u krijojnë komunave problem gjyqësore me përmbaruesit.
“Komunat nuk janë kundër Kontratave Kolektive por mbulueshmëria financiare dhe borxhet që burojnë nga këto kontrata duhet të mbulohen nga niveli qendror sepse ato janë nënshkruese të këtyre kontratave e jo Komunat”, thuhet në njoftimin e AKK-së.
Tutje në njoftim thuhet se në takimin e Komisionit të Granteve ka qenë prezent edhe Ministri i Ministrisë së Pushtetit Lokal, Elbert Krasniqi, i cili ka votuar kundër kërkesave të komunave, që obligimet financiare për zbatimin e Kontratave Kolektive të mbulohen nga niveli qendror.
Për padinë ndaj MASHTI-it dhe MSH-së, komunat do të vendosin ditëve në vijim.