Të hënën e 15 gushtit, konfindustria shqiptare me anë të një njoftimi ka vlerësuar se është e domosdoshme që marrëveshja koncesionare e privatizimit dhe ndryshimit të qëllimit të shërbimit të tij, të bëhet e njohur për publikun dhe të kalojë për miratim në Kuvendin e Shqipërisë.
Në njoftim thuhet se konfindustria shqiptare ka paqartësi dhe mungesë të skajshme informacioni publik për koncesionin e Portit të Durrësit.
“Është e domosdoshme të sqarohet para së gjithash, nëse njihen pronarët fundorë të kompanisë partnere të koncesionit si dhe vlera, burimi, mënyra, koha dhe garancitë ligjore të kryerjës së investimit të parashikuar. Do të ishte krejtësisht e papranueshme dhe me pasoja të paparishikueshme ekonomike, të luftës kunder pastrimit të parave dhe sigurisë, nëse kompania partnere do të jetë e regjistruar në parajsa fiskale”, thuhet në njoftimin e Konfidustrisë shqiptare.
Tutje në njoftimin e tyre thuhet se shteti shqiptar kapitalizon mbi 1.5 milion m2 siperfaqe trualli të Portit të Durrësit me vlerë shumë të lartë, që do të jetë automatikisht pronë e koncesionarit.
“Një pasuri e tillë e çmuar nuk do të jetë më pronë e shtetit shqiptar, por është e privatizuar “de jure”, që në çastin e derdhjes si kontribut në kapitalin e konçesionarit në të cilin administrimin e bën partneri privat, që zotëron 70% të aksioneve”.