Kryeministri i Kosovës, Albin Kurti, ka shkruar rreth konfiskimit të një veturë me targa, në të cilën kishte një arsenal armesh dhe pajisje të ndryshme ushtarake. Kështu Policia e Kosovës (PK) në bashkëpunim me Agjencinë e Kosovës për Inteligjencë (AKI) kanë parandaluar një sulm terrorist.

Kurti, ka thënë se panorama e këtij organizmi terrorist është e qartë.

“vetura me targa të Beogradit, pronë e ndërmarrjes shtetërore të hekurudhave të Serbisë; armatimi i gjetur i gjithi prodhim i Serbisë, ndër to granata të dorës prodhuar në vitin 2021, të tilla që janë përdorur në sulmin e 29 majit 2023 në Zveçan kundër ushtarëve të KFOR-it; jelekë me mbishkrime të njësiteve ruse, serbe dhe logo e shenja identifikuese të organizatës “Severna Brigada”, si dhe mjete shpërthyese të përdorura më herët nga formacioni ilegal me aktivitete kriminale “Mbrojtja Civile”. Sasia e madhe e armatimit të gjetur tregon për përmasat e aksionit të planifikuar e të pasojave të parandaluara”, ka shkruar Kurti.

Më tej, Kurti ka thënë se Serbia qartazi është pozicionuar për përshkallëzim të situatës, duke çuar edhe një hap më tutje me organizmin e sulmeve terroriste.

“Serbia qartazi është e pozicionuar për përshkallëzim të situatës. Përveç agresionit që Serbia ka ndërmarrë ndaj Republikës së Kosovës duke rrëmbyer 3 zyrtarë të Policisë së Kosovës brenda territorit tonë në 14 qershor 2023, ajo luftimin e rendit juridik dhe kushtetues të Republikës së Kosovës e ka çuar një hap me tutje me organizimin e sulmeve terroriste.”

Ai ka falënderuar organet kompetente për këtë aksion.

“Unë i jam falënderues PK-së dhe AKI-së për punën që po bëjnë gjithë këto kohë në ruajtjen e ligjshmërisë dhe kushtetutshmërisë dhe në parandalimin e krimit e terrorizmit në atë pjesë të Republikës së Kosovës”, ka përfunduar Kurti.

Çka u sekuestrua

Procesimi i vendit të ngjarjes është kryer pas mesnate rreth orës 00:33, duke sekuestruar veturën Audi A6 me targa BG-955-JW, si dhe gjësendet e gjetura në veturë, siç janë;
• 9 Zolla;
• 2 Lansues;
• 2 Osa;
• 1 Predhë e minahedhësit;
• 21 Granata dore;
• 20 Predha të troblonit;
• 2 Mbushëse të barutit;
• 10 Arme të gjata automatike;
• 1 Revole;
• 1 Shurdhues i armeve;
• 51 Karikator të armeve të gjata;
• 5 Karikator të armeve të shkurtra;
• 5756 Fishek të kalibrit të ndryshëm;
• 18 Koktej molotovi;
• 17 Mjete piroteknike;
• 14 Mjete tymuese;
• 5 Thika Ushtarake;
• 11 Jelek anti plumb dhe Jelek taktik;
• 9 Uniforma Ushtarake;
• 1 Pale Dylbi;
• 2 Maska pambuku për kokë;
• 1 Maskë kundër helmeve dhe gazrave;
• 1 Dyshek ushtarak (për snajperit);
• 19 Emblema të Severna Brigada
• 1 Telefon ajrore me SIM kartele dhe numër;
• 3 Radiolidhje, mbushës të radiolidhjeve;
• Si dhe një sasi e Narkotikeve.
• 1 Veturë Audi A6 me targa BG-955-JW