Policia e Kosovës të shtunën ka konfiskuar 29 mijë pako cigare që kishin prejardhje nga Serbia e që kishin vlerë 60 mijë euro në fshatin Smirë të Vitisë.
Në njoftim thuhet se policia ka ndaluar një automjet pa targa të cilin e drejtonte një person me inicialet A.S., shtetas kosovar.
Gjatë kontrollit, policia ka vërejtur se i dyshuari kishte të ngarkuar cigare pa banderola të Kosovës.
“Gjatë kontrollit të automjetit, policia ka hasur të ngarkuar cigare të llojit ‘Monus Slims ‘: 58 paketime të mëdha me gjithsej 29 000 pako cigare. Malli dyshohet të jetë i prodhuar në Serbi dhe vlera e tregut është rreth 60.000 euro”, thuhet në njoftim.
I dyshuari është ndaluar për 48 orë, ndërsa malli i kontrabanduar dhe automjeti janë sekuestruar dhe janë dërguar në terminalin doganor – Dheu i Bardhë.