Tashmë ka filluar konfiskimi i banesës dhe restorantit të kryeterroristit serb, Milan Radojiçiq.
Lajmin për Dukagjinin e ka konfirmuar zëvendësdrejtori i Policisë për rajonin e Veriut, Veton Elshani.
Elshani ka thënë se sot zyrtarët e Agjencisë për Administrimin e Pasurisë së Sekuestruar dhe të Konfiskuar (AAPSK), në bashkëpunim me Policinë e Kosovës, kanë filluar ekzekutimin e Urdhrit Ndalues Përfundimtar të Përkohshëm për administrimin e pasurisë së specifikuar.
“Ju informojmë se zyrtarët e Agjencisë për Administrimin e Pasurisë së Sekuestruar dhe të Konfiskuar (AAPSK), në bashkëpunim me Policinë e Kosovës, kanë filluar ekzekutimin e Urdhrit Ndalues Përfundimtar të Përkohshëm për administrimin e pasurisë se specifikuar tek Administruesi i Pasurisë të nxjerrë nga Gjykata Themelore – Departamenti Special në Prishtinë të Vërtetuar me Aktvendim nga Gjykata e Apelit e Kosovës – Departamenti Special”, ka thënë Elshani.
Ai ka thënë se agjencia ka filluar evidentimin e këtyre pasurive, ku sot është duke u konfiskuar edhe restoranti “Grey” dhe një banesë në katin e gjashtë të asaj ndërtese.
“Agjencia ka filluar evidentimin e pasurive të përshkruara në urdhrin e lartcekur, ndër to edhe vila tek Ujmani në Zubin Potok me objekte përcjellëse në pajtim me Ligjin për Administrimin e Pasurisë së Sekuestruar dhe të Konfiskuar dhe Urdhrin e Gjykatës. Sot po konfiskohet edhe restoranti ‘Grey’ dhe një banesë në katin e 6 të asaj ndërtese”, ka thënë ai.
Ministrja e Drejtësisë, Albulena Haxhiu, dje ka njoftuar se kanë nisur zbatimin e Urdhrit Ndalues përfundimtar me masë të përkohshme, lidhur me pasuritë e paluajtshme në rastin “Banjska”.
Lexo më shumë: Nis zbatimi i Urdhrit Ndalues lidhur me pasuritë e paluajtshme të Radojçiqit në veri
“Ministria e Drejtësisë, përmes zyrtarëve të Agjencisë për Administrimin e Pasurisë së Sekuestruar dhe të Konfiskuar, kanë nisur zbatimin e Urdhrit Ndalues përfundimtar me masë të përkohshme, lidhur me pasuritë e paluajtshme në rastin Banjska”, ka shkruar Haxhiu.