Para rreth një viti, Dhomës së Përfaqësuesve në Kongresin Amerikan, iu dërgua një rezolutë e rëndësishme për tri vrasje, për të cilat SHBA-ja ka një kohë që po kërkon drejtësi.
Rezoluta, që u miratua nga Kongresi të enjten, ka të bëjë me vrasjen e vëllezërve Bytyçi.
Përmes saj, kongresi po i kërkon Qeverisë së Serbisë që t’i zbuloj vrasësit.
“Qeveria e Serbisë, ministritë dhe zyrat e saj përkatëse, duke përfshirë edhe Prokurorinë e Serbisë për Krimet e Luftës, duhet ta bëjnë prioritet hetimin dhe ndjekjen penale sa më shpejt që të jetë e mundur të zyrtarëve aktualë ose edhe ish-zyrtarëve, që besohet se janë përgjegjës për vdekjen e tyre, drejtpërdrejt ose në mënyrë indirekte”, thuhet në Rezolutën e Kongresit.
Në dokument theksohet se edhe pse autoritetet serbe e hetuan rastin, ato asnjëherë nuk i akuzuan individët që ishin pjesë e zinxhirit komandues të Ministrisë së Punëve të Brendshme.
Këtu përmendet ish-ministri i Brendshëm i Serbisë, Vlajko Stojilkoviq, shefi i DepartamentitGjykata E të Sigurisë Publike, Vlastimir Gjordeviq dhe komandanti i kampit të stërvitjes operacionale, Goran Radosavljeviq i njohur si Guri.
“Ndërsa Presidenti serb Aleksandër Vuçiq u premtoi disa zyrtarëve të lartë të Shteteve të Bashkuara të Amerikës se do të ketë drejtësi në rastet e vdekjes së Ylli, Agron dhe Mehmet Bytyqi, asnjë individ nuk është shpallur fajtor”, thuhet në Rezolutën e Kongresit.
Madje, në dokument ky rast përmendet si mjaft i rëndësishëm për raportet mes ShBA-së dhe Serbisë.
“Progresi në zgjidhjen e këtij rasti ose mungesa e tij, duhet të mbetet një faktor i rëndësishëm që përcakton zhvillimin e mëtejshëm të marrëdhënieve ndërmjet Shteteve të Bashkuara dhe Republikës së Serbisë”, thuhet në Rezolutën e Kongresit.
Se Serbia po neglizhon gjykimin e krimeve të luftës, e thonë edhe në Fondin për të Drejtën Humanitare.
“Ne, përveç vëllezërve Bytyçi poashtu edhe në krahasim me rastet e tjera apo me krimet e tjera të cilat kanë ndodhur gjatë periudhës 98-99, po e shohim një amnisti në heshtje nga ana Serbia, për arsye se më shumë se 20 vjet pas luftës nuk kemi shumë persona të cilët janë proceduar dhe dënuar nga gjyqësori i Serbisë”, ka thënë Amer Alijaj, nga Fondi për të Drejtën Humanitare.
Për vrasjen e vëllezërve Bytyçi, në Prokuroria e Serbisë në vitin 2006 e kishte ngritur një aktakzuzë kundër dy zyrtarëve të lartë të ministrisë së punëve të Brendshme të Serbisë, Sreten Popoviq dhe Millosh Stojanoviq.
Megjithatë, ata ishin liruar më pas nga Gjykata e Apelit.
Shtetasit amerikanë me origjinë shqiptare, Ylli, Agron dhe Mehmet Bytyqi u vranë në Serbi më 1999, pak muaj pas luftës në Kosovë.
Ata ishin vrarë, pasi gabimisht kishin hyrë në territorin e Serbisë.