Kongresisti amerikan Keith Self e ka cilësuar Kosovën si një nga partnerët më të afërt dhe më besnikë të Shteteve të Bashkuara në Evropë.
“Unë mund të iu them se Kosova është padyshim një nga partnerët më të afërt dhe më besnikë evropian të Shteteve të Bashkuara të Amerikës”, ka deklaruar ai.
Ai ka kërkuar rritjen e presionit diplomatik ndaj katër shteteve anëtare të NATO-s që ende nuk e kanë njohur pavarësinë e Kosovës, duke theksuar se kjo çështje po pengon rrugën e vendit drejt integrimit euroatlantik.
Në një seancë të Komisionit për Punë të Jashtme në Dhomën e Përfaqësuesve të SHBA-së, Self i ka bërë thirrje Spanjës, Greqisë, Rumanisë dhe Sllovakisë që ta rishikojnë qëndrimin e tyre dhe ta njohin Kosovën si shtet të pavarur.
Ai ka theksuar se mosnjohja nga këto vende krijon vakum politik brenda NATO-s dhe e vështirëson avancimin e Kosovës në strukturat euroatlantike.