Zëvendëskryeministri i parë dhe Kryediplomati i Kosovës, Glauk Konjufca, gjatë pjesëmarrjes në Samitin e Diasporës në Shqipëri ka folur për çështjen e zgjedhjes së presidentit të Kosovës.
Konjufca, tregoi që negociatat për zgjedhjen e Presidentit po vijojnë dhe zgjidhja, sipas tij, do të varet nga vullneti i opozitës, shkruan A2, transmeton Dukagjini.
“Bisedat po vazhdojnë mes kryeministrit dhe partive politike. Ka takuar kreun e LDK-së, një ftesë ia ka dërguar edhe PDK-së. Ata kanë kërkuar disa sqarime shtesë, të cilat me siguri që kryeministri do u përgjigjet shpejt. Ka përpjekje për të shkuar në një marrëveshje”, tha Konjufca.
Sipas tij, gjithçka varet nga vullneti i opozitës dhe se VV-ja nuk insiston patjetër që të ketë emrin e saj.
“Vetëvendosja nuk insiston patjetër që të ketë emrin e saj në zgjedhjen e Presidentit. Nëse nuk ka pasur vullnet, është vërtetuar në seancë ku nuk kanë ardhur. Kjo tregon se ata kërkojnë diçka tjetër, por mirë është të na e thonë se çfarë kërkojnë”, shtoi Konjufca.