Kryetari i Kuvendit të Kosovës, Glauk Konjufca, ka votuar në zgjedhjet e brendshme të Lëvizjes Vetëvendosje, zgjedhje këto, të cilat sipas tij, po tregojnë demokracinë e brendshme progresive dhe të shëndetshme të subjektit politik.
Në këto zgjedhje të brendshme, Kryeministri i Kosovës, Albin Kurti njëherit kryetari dhe kandidati për kryetar të LVV-së nuk ka kundërkandidat. Sipas Konjufcës, ky ishte qëndrimi i të gjithë anëtarëve të partisë.
“Për Kryetar të VETËVENDOSJE, sot vetëm Albin Kurti nuk ka kundërkandidat. Jo për shkak të asaj që thonë oponentët tanë politikë, por sepse ky ishte qëndrimi i të gjithë anëtarëve tanë të partisë, pa përjashtim. Shtoja kësaj që, kandidimi i dikujt vetëm sa për sy e faqe, nuk i shërben demokracisë, por përkundrazi e dëmton seriozisht atë”, ka shkruar ai.
Gjersa ka vlerësuar pjesëmarrjen e kënaqshme politike, ai ka veçuar atë të të rinjve.
Për herë të parë këtë vit, LVV do të formojë organizatën e gruas me kandidate për kryetare Ministren Haxhiu si dhe RVV-në, Organizatën e të Rinjve për Vetëvendosje.