Të martën e 12 prillit në Këshillin për Demokraci dhe të Drejta të Njeriut, të themeluar nga Presidenca e Kosovës, ku mori pjesë dhe Kryetari i Kuvendit të Republikës së Kosovës Glauk Konjufca, në fjalën e tij ka thënë se, Kosova ka dy aspirata, anëtarësimin në Aleancën Veri Atlantike (NATO) dhe në Bashkimin Evropian (BE).
Ai ka thënë se vendet demokratike, kryesisht, janë të rreshtuara pranë këtyre dy aspiratave tona.
“Përcaktimi ynë është shumë i qartë. Sot demokracitë më të fuqishme të botës janë të organizuara në dy institucione shumë të rëndësishme që ne i aspirojmë, në Bashkimin Evropian, ku e kemi rrugën e qartë, rrugën e transformimit, si dhe në Aleancën më të fuqishme ushtarake, NATO-n, ku synojmë të anëtarësohemi sa më shpejt”, ka thënë, Konjufca.
Sipas kryetarit të Kuvendit, për të pasur demokraci nevojiten edhe aleanca me demokracitë e tjera.
“Siç po e shohim edhe prej ngjarjeve të fundit në botë dhe invazionit të Rusisë mbi Ukrainën, se demokracia nuk mund të qëndrojë vetë, por nevojiten aleanca me demokracitë e tjera, për sa kohë edhe në botë po e shohim se autokratët janë më të lidhur se kurrë me njëri-tjetrin”, ka thënë ai.
Nëpërmjet Këshillit për Demokraci dhe të Drejta të Njeriut synohet bashkërendimi institucional për fuqizim të demokracisë përmes tri shtyllave, luftës ndaj korrupsionit, luftës ndaj autoritarizmit, si dhe përmes avancimit të të drejtave të njeriut.