Shefja e Grupit Parlamentar të Lëvizjes Vetëvendosje (LVV), Mimoza Kusari-Lila, pas mbledhjes së Kryesisë së Kuvendit ka deklaruar se puna e kësaj mbledhjeje nuk ka vijuar sikur herave të tjera për shkak se opozita e ka bojkotuar.
Kusari-Lila, ndër të tjera, ka bërë të ditur se kryetari i Kuvendit të Kosovës, Glauk Konjufca, nuk do të jetë në vendin e tij të punës disa ditë, si shkak i një lëndimi fizik.
“Duhet të qëndrojë në shtëpi 10 ditë në mënyrë që të ketë rikuperim të këmbës”, ka deklaruar ajo.
Deputetja Kusari-Lila në lidhje me mosekzekutimin e pagave për mësimdhënësit ka thënë se mësimdhënësit duhet të jenë në linjë të njëjtë në raport me vendimin e MAShTI-t për kompensimin e orëve mësimore.
“Të vendosësh apo të ngarkosh nxënësit me një çështje që është e rëndë për shoqërinë, për ne është e papranueshme”, ka vijuar ajo.
Sipas saj, kjo situatë ka të bëjë me problematikë ligjore e jo politike.
“Çështja e kësaj ngecjeje është problem ligjor”, ka shtuar deputetja.
Ajo ka thënë se për shkak të bojkotimit të mbledhjes nga opozita nuk është bërë shqyrtimi i pikave për seancën plenare të ardhshme që do të duhej të mbahej më 14 tetor.
Opozita bojkoton mbledhjen e kryesisë, shkak mosekzekutimi i pagave për mësimdhënësit