Kryetari i Kuvendit të Kosovës, Glauk Konjufca ka thënë se një marrëveshje me Serbinë do të bëhet atëherë kur të ndryshojë ajo.
Në një intervistë për KP, Konjufca ka thënë se nuk pret diçka pa u demokratizuar Serbia.
“Sa është Serbia kështu hegjemoniste dhe brenda koordinatave le të themi kleronacionalizmit të kohës së Millosheviqit të viteve ‘90-ta, unë nuk pres zgjidhje në kuptimin e një marrëveshjeje me Serbinë. Marrëveshja me Serbinë bëhet kur të ndryshojë Serbia, jo me këtë Serbi aktuale e cila është”, thotë ai.
Ndërkaq, kryeparlamentari Konjufca ka thënë se puna e ekipit menaxhues që hartoi draft-statutin e Asociacionit, ishte në përputhje me interesat e Serbisë.
“Prezantuan një Asociacion i cili është ‘Republikë serbe’ në Kosovë dhe shumë mirë që u shkarkuan”, shton Konjufca.
Konjufca thekson se kushtëzimi për themelimin e Asociacionit me kthimin e serbëve në institucione nuk mund të zgjidh problemet.
“Pa u kthyer serbët në institucione nuk mund të vazhdojë procesi në kuptimin e dialogimit, negociatave dhe kushtëzimeve që po i bëjnë tash për Asociacionin. Qëndrimi i QUINT-it ka qenë shumë i qartë, pranim i institucioneve të Kosovës, kthim në institucionet e Kosovës, pranim i kornizës kushtetuese në të cilën funksionon Kosova dhe pastaj kalojmë në hapa të tjerë”, thekson ai.
Në takimin e 2 majit në mes Kryeministrit të Republikës së Kosovës, Albin Kurti dhe Presidentit të Serbisë, Aleksandër Vuçiq është prezantuar draft-statuti i Asociacionit, nga ekipi menaxhues, tashmë i shkarkuar nga Qeveria e Kosovës.
Pas takimit, kryeministri Kurti tha se draft-statut i propozuar qe i papranueshëm për Kosovën, derisa bëri të ditur se ka paraqitur një draft-vizion për themelimin e Asociacionit.
Sipas Josep Borrell, ndonëse draft-statut për Asociacionin nuk ishte ai final, i njëjti do të jetë një pikënisje për diskutimet e mëtutjshme.