Kryetari i Kuvendit të Kosovës, Glauk Konjufca, të martën e 15 nëntorit ka pritur në takim delegacionin e komisionit të Partneritetit për Demokraci të Kongresit të SHBA-së.
Në këtë takim, sipas njoftimit të zyrës së Kuvendit të Kosovës thuhet se janë shkëmbyer pikëpamje rreth mënyrave konkrete të bashkëpunimit ndërmjet HDP-së dhe kuvendit.
Kjo me fokus mbështetjen për ngritjen e Institutit Parlamentar, si dhe zhvillimin e shërbimeve të bibliotekës dhe arkivit të legjislativit.
“Kryetari Konjufca dhe delegacioni i HDP-së u pajtuan për zgjerimin e mëtutjeshëm të bashkëpunimit, si dhe shkëmbimin e përvojave në dobi të ngritjes së efikasitetit dhe funksionalitetit të përgjithshëm të Kuvendit të Republikës së Kosovës”, thuhet në njoftim.
Kryeparlamentari Konjufca të njëjtit i ka njoftuar në lidhje me efikasitetin e punës së kuvendit dhe trupave të tij.
Ai ka falënderuar ShBA-në për mbështetjen e pakursyer që vazhdon t’i japë Kosovës.
“Duke theksuar se miqësia e dëshmuar, aleanca strategjike dhe partneriteti shembullor ndërmjet popujve dhe shteteve tona mbeten të palëkundura”, vijon njoftimi.
Pjesë e këtij takimi ishin një delegacion nga Komisioni i Partneritetit për Demokraci (House Democracy Partnership-HDP) të Kongresit të ShBA-së, në përbërje Mike Bishop, ish-kongresmen nga Partia Republikane, Derek Luyten, drejtor ekzekutiv i HDP-së, Kimberly Ferguson, specialiste për Menaxhimin e Sistemit Informativ Legjislativ në Bibliotekën e Kongresit, Sarah Garding, analiste për Çështje Evropiane në Shërbimin e Kërkimit të Kongresit (CRS) dhe Kristen Sample, drejtore e përgjithshme e Qeverisjes në Zyrën Qendrore të NDI në Washington DC.