Kryetari i Kuvendit të Kosovës, Glauk Konjufca, me rastin e 23 vjetorit të masakrës së fshatit Hallaq të komunës së Lipjanit, ka thënë se sakrifica e bërë për liri është akti më i lartë i atdhedashurisë.
Ai, teksa ka përkujtuar martirët, ka vendosur kurora lulesh në memorialin e të rënëve të këtij fshati, ku ka theksuar se krenaria është baraz me dhimbjen.
“Dëshmorët dhe martirët i dhanë Kosovës më të shtrenjtën e tyre, jetën, dhe gjaku i tyre është gurthemel i lirisë dhe shtetit tonë të pavarur. Nderimi, respekti dhe kujtimi për të rënët do të jetë i përgjithmonshëm”, është shprehur Konjufca.
Sipas njoftimit nga zyra e kuvendit të Kosovës, Konjufca ka thënë se përvjetorët e këtyre masakrave shtojnë dhimbjet e familjarëve të të rënëve.
“Duke çmuar lart sakrificën sublime të të rënëve të kësaj ane, si dhe luftën e Ushtrisë Çlirimtare të Kosovës, në përvjetorët e këtyre masakrave, dhimbja dhe pikëllimi i familjarëve vetëm sa shtohet”.
Në vazhdën e nderimeve të martirëve dhe dëshmorëve, kryeparlamentari Konjufca gjithashtu bëri homazhe para lapidarit të të rënëve në fshatin Makoc të Komunës së Prishtinës.
Ai vendosi kurora lulesh duke çmuar sakrificën e secilit që dha jetën për liri.
Ndërkaq, të hënën e 18 prillit, gjatë tubimit përkujtimor në 23 vjetorin e masakrës serbe në rajonin e Llapit dhe Gollakut, Konjufca ka thënë se teksa Kosova po i kujton të rënët për liri, Serbia po bën homazhe te ish-kryetari i saj, Sllobodan Millosheviq, për fajin e të cilit vdiqën mbi 160 mijë civilë në shumë vende të Ballkanit.
Ai ka theksuar se përgjegjësi i këtyre masakrave të kryera është shteti i Serbisë që me ushtrinë, policinë, me aparatin shtetëror e paramilitarët, i ka kontrolluar e i ka urdhëruar për të gjitha këto krime me mbi 300 masakra anë e kënd Kosovës.
“Jemi mbledhur këtu që t’i kujtojmë 227 të rënët që kanë dhënë jetën për lirinë e popullit tonë. Vetëm gjatë luftës së fundit gjenocidi i Serbisë i ka vrarë mbi 12 mijë qytetarë shqiptarë në Kosovë dhe përgjegjësi është shumë i qartë, ky është shteti i Serbisë”, kishte thënë Konjufca.
Teksa i ka renditur krimet e Serbisë të kryera në Kosovë gjatë luftës, Konjufca ka thënë se Serbia ende nuk ka ndryshur drejtim.
Derisa i ka nderuar e kujtuar të rënët për liri, Konjufca ka potencuar se dëshmorët që e dhanë jetën me pushkë në dorë e martirët që e derdhen gjakun për lirinë e Kosovës, e kanë dhënë jetën që fëmijët të mund të jetojnë të lrië e ta gëzojnë Kosovën e lirë.
Konjufca: Ne po i nderojmë të rënët për liri, kurse Serbia kasapin e vet