Konjufca ka pritur në takim ambasadoren greke, Heleni Vakali.
Kryetari i Kuvendit të Kosovës, Glauk Konjufca, është takuar me shefen e Zyrës Ndërlidhëse të Greqisë në Kosovë, Heleni Vakali.
Konjufca ka vlerësuar raportet e mira mes dy shteteve, duke çmuar përkrahjen e Greqisë, e njëherësh, gatishmërinë e avancimit të raporteve ndërshtetërore dhe thellimin e bashkëpunimit në projekte të ndryshme me interes të përbashkët.
Konjufca ka ritheksuar rëndësinë e njohjes së pavarësisë së Kosovës nga Greqia dhe mbështetjen për proceset e integrimit evropian dhe euroatlantik. Ai ka kërkuar përkrahjen për liberalizimin e vizave, anëtarësimin e Kosovës në Këshillin e Evropës dhe organizata të tjera ndërkombëtare.
Më tej, në këtë takim është shprehur gatishmëria për forcimin e mëtejmë të marrëdhënieve mes Republikës së Kosovës dhe Republikës së Greqisë.
Me 6 maj, diplomatja greke ishte pritur në takim nga Zëvendëskryeministri i parë i Republikës së Kosovës për Integrim Evropian, Zhvillim dhe Dialog, Besnik Bislimi.