Të premten e 29 korrikut, në Kuvendin e Kosovës, është diskutuar për propozimin për shqyrtimin e parë të Projektligjit për rregullimin e çmimit të produkteve medicinale i propozuar nga Partia Demokratike e Kosovës(PDK).
Për këtë projektligj, 9 deputetë kanë votuar për, 42 kundër dhe dy kanë abstenuar, në mesin e tyre edhe kryetari i Kuvendit, Glauk Konjufca.
Për Konjufcën, është hera e dytë që voton ndryshe nga partia e tij.
Kundër miratimit të këtij Projektligji, ka dalë partia në pushtet Lëvizja Vetëvendosje(VV) e cila e ka kritikuar Projektligjin në fjalë, duke thënë se nuk është përpiluar si duhet.
Deputetja e Partisë Demokratike të Kosovës, Floretë Zenjullahu, e ka akuzuar Qeverinë e Kosovës për keqpërdorime dhe për “hajni”, që sipas saj, Qeveria është duke e kryer në raport me çmimet e barnave.
Duke iu referuar raportit të KDI-së, ajo ka thënë se Ministria e Shëndetësisë ka blerë barna me çmim më të shtrenjtë sesa çmimi i tregut.
“Vërtetohen keqpërdorime dhe hajni me barna që kjo qeveri është duke u kryer. Për blerje të oksigjenit nga hulumtimi i KDI-së, rezulton se janë keqpërdorur më shumë se 57 mijë euro. Rasti tjetër për paracetamol që kushton një euro, msh e ka ble mbi 3 euro”, ka deklaruar Zenjullahu.
Në emër të PDK-së, Zenjullahu ka propozuar që të caktohet një çmim fiks apo maksimal për rregullimin e çmimit të barnave. Sipas saj, qytetarët janë dëmtuar vazhdimisht si pasojë e çmimeve të larta të barnave, sidomos atyre esenciale.
Ndërsa, deputeti i Aleancës për Ardhmërinë e Kosovës (AAK), Shemsedin Dreshaj, ka thënë se më mirë një ligj i keq sesa të mos e ketë fare.
Sipas tij, projektligji i propozuar nga opozita, mund të miratohet në lexim të parë kurse në lexim të dytë bashkë me pozitën ta ripërpunojnë atë.
“Ma mirë është ligji i keq se të mos ketë ligj. Një fushë që nuk ka qenë e rregulluar deri më sot të rregullohet. Ky ligj është i gatshëm, këtë ligj e kemi në lexim të gatshëm, mund ta ripërpunojmë”, ka deklaruar Dreshaj.
“E ftoj ministrin ta mbështesë këtë ligj dhe mandej ta përpunojmë. Brenda dy leximeve ligji mund të ndërrohet e përpunohet”, ka vijuar ai.
Tutje, Dreshaj është shprehur se nëse pushtetit i pengon që opozita e ka propozuar Projektligjin, mund të heqin dorë dhe ta marrë pozita.
“Rekomandoj që nëse është pengesë që ky ligj ka ardhur nga opozita, t’ia ndërrojmë o burra e gra preambulën dhe të dalë si ligj i pozitës”.
Në fund, Dreshaj ka pasur një mesazh për deputetët në gjuhën angleze “Don’t look back my son”, që i bie “Mos shiko prapa”.