Policia e Kosovës në vazhdën e zbatimit të planit operativ “Migrimi i parregullt”, të premten e 16 shtatorit ka arrestuar një person të dyshuar dhe disa viktima të trafikimit me migrantë në Vermicë.
“Njësia policore nga stacioni policor për mbikëqyrje të kufirit në Vërmicë, kanë ndaluar një automjet me targa vendore me drejtues të dyshuarin mashkull kosovar, i cili ishte duke marrë katër persona shtetas sirianë që dyshohet se janë migrantë të parregullt”.
“Gjatë kontrollimit të personit të dyshuar mashkull kosovar i janë gjetur 2 qese të vogla me gjithsej 122 gramë substancë narkotike të dyshuar të llojit ‘marihuanë”, shkruhej në njoftimi e policisë.
Në lidhje me rastin janë njoftuar njësitë kompetente policore ndërsa në konsultim me prokurorin të dyshuarit i është iniciuar rasti “ Kontrabandim me migrantë” si dhe “Blerja, posedimi, shpërndarja e paautorizuar e narkotikëve dhe substancave psikotrope dhe analoge”.
Ndërkaq i arrestuari është dërguar në mbajtje për 48 orë.