Anthony Joshua, i cili ka gati një vit pa u ngjitur në ring, vijon përgatitjet për rikthimin e tij të madh. Ndërsa menaxheri i tij ka zhvilluar bisedime me disa boksierë të njohur, përfshirë edhe Tyson Fury, britaniku mbetet ende larg vëmendjes mediatike.
Megjithatë, ai nuk i ka shpëtuar kontrollit të papritur të Federatës Angleze të Boksit, e cila e testoi për doping gjatë qëndrimit të tij në Dubai.
35-vjeçari ndodhej në shoqërinë e promotorit Eddie Hearn, duke konsumuar darkë, kur agjentët iu afruan dhe i kërkuan të kryente testin. Sipas rregullores, çdo boksier është i detyruar t’i nënshtrohet kontrollit në çdo kohë dhe vend, përndryshe përballet me sanksione.
Vetë Hearn filmoi momentin dhe e publikoi në rrjetet sociale, duke e cilësuar Joshuan si “boksierin më të testuar në histori”.
“Nuk ka boksuar për një vit. Ulem për darkë në Dubai dhe testuesit anti-doping shfaqen në qendër të vëmendjes”, shkroi ai.
Joshua ka marrë disa ftesa për duele, përfshirë edhe një sfidë nga youtuberi Jake Paul, por britaniku e ka refuzuar.