Policia e Kosovës, në bashkëpunim me Prokurorinë dhe Administratën Tatimore të Kosovës (ATK), ka zhvilluar një aksion inspektimi në parkingje në Podujevë, Lipjan, Obiliq dhe Graçanicë, ku janë evidentuar shkelje të shumta që lidhen me shmangien nga tatimi dhe ushtrimin e veprimtarisë në kundërshtim me ligjin.
Sipas njoftimit të Policisë, gjatë kontrolleve janë konstatuar biznese të paregjistruara, ushtrim i aktivitetit pa arkë fiskale, moslëshim i kuponëve fiskalë, punëtorë të paregjistruar, si dhe biznese që operonin pa kontrata qiraje.
“Njësitet policore në koordinim dhe bashkëpunim me Prokurorinë dhe ATK-në, gjatë inspektimeve nëpër parkingje në qytete të ndryshme si Podujevë, Lipjan, Obiliq dhe Graçanicë kanë evidentuar shkelje të ndryshme si: biznese të paregjistruara, ushtrim i aktivitetit pa arkë fiskale, moslëshim i kuponëve fiskalë, punëtorë të paregjistruar, biznese pa kontrata qiraje etj.”
Policia bëri të ditur se për të gjitha shkeljet e evidentuara janë njoftuar autoritetet përkatëse dhe rasti është koordinuar vazhdimisht me prokurorin kompetent.
“Të gjitha shkeljet do të trajtohen nga autoritetet sipas kompetencës. Lidhur me të gjeturat është informuar dhe konsultuar në vazhdimësi prokurori. Inspektimet vazhdojnë.”