Ambasadori dhe përfaqësuesi i Shqipërisë pranë Këshillit të Evropës (KiE), Dastid Koreshi, ka vlerësuar se një koordinim i jashtëzakonshëm dhe punë intensive është bërë për procesin e anëtarësimit të Kosovës në Këshillin e Evropës.
“Ka qenë një koordinim i jashtëzakonshëm, një punë e strukturuar dhe një punë e përditshme intensive, pesë muaj para se Kosova të paraqesë aplikimim, biles përpara se të përjashtohej Rusia nga Këshilli i Evropës. Kjo është një ndërmarrje shumë serioze dhe për t’u arritur një sukses duhet një punë shumë serioze, është bërë një punë shumë serioze dhe është bërë një studim dhe planveprim i jashtëzakonshëm nga autoritet e Kosovës, që ky proces të mos dështonte”, ka thënë ai në “Debat Plus”.
Koreshi ka theksuar angazhimin e autoriteteve të Kosovës për të siguruar suksesin e këtij procesi, duke theksuar frymën përkrahëse në Këshillin e Evropës për anëtarësimin e Kosovës, që, sipas tij, duhet të kishte ndodhur që në vitin 2008.
“Dhe unë kam pasur fatin që kam qenë këtu gjatë gjithë kohës, që në momentin e aplikimit dhe kam parë sesi ka avancuar, dhe fryma që ekzistonte në Këshillin e Evropës ishte për ta përkrahim Kosovën. Kosova duhet të ishte anëtare e kësaj organizate që në 2008-tën”, ka deklaruar ai.
Në lidhje me procedurat e tjera, Koreshi ka përmendur se ndër 46 vendet anëtare të Këshillit të Evropës, 34 njohin Kosovën, ndërsa 12 nuk e njohin, dhe thekson nevojën për një punë bindëse me ato që nuk e njohin.
Ndërkaq, ai ka shmangur rrezikun e mundshëm për anëtarësim të kushtëzuar me themelimin e Asociacionit.