Para Teatrit Kombëtar të Kosovës, në Prishtinë, u ndezën qirinj në nderim të Andrew Strong, i cili vdiq të hënën.
Strong ishte avokati i ish-kryeparlamentarit, Kadri Veseli, i cili po gjykohet në Hagë.
Në këtë organizmin që u bë nga platforma “Liria ka emër”, morën pjesë edhe bashkëshortja e Veselit, Violeta, së bashku me fëmijët e saj.
Gjithashtu, morën pjesë edhe akterë politikë, ndër ta kryetari i AAK-së, Ramush Haradinaj dhe i pari i PDK-së, Memli Krasniqi.
“Sonte, bashkë me Violetën, bashkëshorten e z.Kadri Veselit dhe fëmijët e saj, pjestarë të ekipit mbrojtës, akterë politik e institucional, si kryetari i PDK-së z.Memli Krasniqi, nënkryetarët znj.Vlora Çitaku e z.Uran Ismaili, kryetari i AAK-së z. Haradinaj, deputetë e ish- deputetë, asambleistë, të rinjë e qytetarë të Kosovës, nderuam me ndezje të qirinjëve z. Andrew Strong, mikun e Kosovës dhe mbrojtësin e çlirimtarëve tanë në Hagë, i cili dje ndërroj jetë papritur në moshë të hershme”, thuhet në njoftim.
“Kosova dhe çlirimtarët të janë mirënjohës përjetë, mik i nderuar.
Prehu në paqe!”
E i pari i AAK-së, Ramush Haradinaj, tha se do të jetë i përjetshëm kujtimi për avokatin Strong.
“I përjetshëm kujtimi për ty, Andrew!”
Kurse, kryetari i PDK-së, Memli Krasniqi, tha se Strong kishte drejtësinë mision dhe e dinte pafajësinë e krerëve dhe të luftës së UÇK-së.
“Dje, në mënyrë të papritur dhe të parakohshme, na la miku ynë, avokati i Kadri Veselit, Andrew Strong. Përtej rolit të tij si avokat, Andrew ishte një njeri i mirë dhe i drejtë, i cili me tërë qenien e tij u vu në mbrojtje të Ushtrisë Çlirimtare të Kosovës dhe të shtetit tonë. Këtë ai nuk e bëri vetëm pse e kishte profesion, por sepse drejtësinë e kishte mision. Andrew e dinte pafajësinë e krerëve të UÇK-së, siç e dinte pastërtinë e luftës së popullit tonë për liri, prandaj, me mendje e zemër u përkushtua secilën ditë të angazhimit të tij në këtë proces”, ka shkruar Krasniqi në Facebook.