Pa marrëveshje për targat dhe pa takim trepalësh. Ky është epilogu nga takimet e ndara të Kosovës dhe Serbisë me përfaqësuesin e Bashkimit Evropian për Dialogun, Miroslav Lajçak, gjatë së premtes, në Bruksel.
Kryenegociatori kosovar, Besnik Bislimi, gjithë vizitën për kryeqendrën evropiane e vlerësoi si të kotë.
“Fatkeqësisht sot pamë një sjellje shumë të çuditshme të palës serbe, e cila thotë e kemi një ide, por nuk mund ta shpalosim, kemi probleme politike, nuk mund ta sjellim, thjesht në këtë drejtim, udhëtimi ka qenë krejt i kotë, për arsye se ata duket vetëm kanë ardhur në Bruksel sa për ta krijuar lajmin se dëshirojnë të bisedojnë, mirëpo kanë ardhur pa kurrfarë ideje, pa kurrfarë propozimi dhe pa kurrfarë zgjidhje”, ka deklaruar Kryenegociatori i Kosovës dhe njëherësh zëvendëskryeministri, Besnik Bislimi.
E arsye për dështimin e një takimi trepalësh mes Kosovës dhe Serbisë, nën ndërmjetësimin e Lajçak, Bislimi e bën kërkesën e Beogradit, për të diskutuar edhe për Asociacionin.
“Unë kam kërkuar takim trepalësh, por si duket në momentin, kur pala serbe është konfrontuar me këtë kërkesë i ka ardhur një intervenim nga Serbia, të cilët kanë dashur ta keqpërdorin këtë, duke e futur një temë të re në agjendë dhe kanë thënë se mund të ndodhë takimi trepalësh, nëse fillimisht bisedohet për Asociacionin e Komunave Serbe, gjë që nuk kemi mundur ta pranojmë sepse agjenda ka qenë e paracaktuar”, ka thënë ai.
Këtë e konfirmoi edhe Petar Petkoviq, që udhëheq ekipin negociator të Serbisë.
“Edhe sot nuk ka pasur takim të drejtpërdrejtë me Bislimin, sepse ai ka refuzuar të diskutojë për Bashkimin e Komunave Serbe dhe çështjen e të pagjeturve, për të cilën ne kemi insistuar. Ai nuk dëshiron të flasë për këtë, edhe pse gojën e kanë plot pyetje për të zhdukurit. Dhe kur ne në mënyrë specifike duhet të biem dakord, ata ndalojnë këtu. Ne jemi ata që tregojmë se kjo çështje nuk është politike, por humanitare dhe se duam ta zgjidhim”, ka thënë Petkoviq.
Më optimist se Bislimi e Petkoviq për takimet, u tregua Përfaqësuesi i BE-së për dialogun, Miroslav Lajçak.
“Sapo përfunduam takimet me kryenegociatorët në Bruksel. Rezultatet janë të përziera. Me keqardhje, nuk kemi arritur marrëveshje për targat, por gjithsesi ne bëmë progres në disa fusha të tjera, përfshirë energjinë. Puna do të vazhdojë”, ka thënë Përfaqësuesi i Lartë i BE-së për dialogun, Miroslav Lajçak.
Palët nuk kanë bërë të ditur se kur do të ketë përsëri takime.
Kryediplomati evropian, Josep Borell deklaroi ditë më parë, se nuk do t’i ftojë liderët në takime të nivelit të lartë, deri sa të mos ketë sinjale të qarta, se do të arrihet përparim konkret.