Me rastin e 110 vjetorit të Pavarësisë së Shqipërisë, ministria e Drejtësisë së Kosovës së bashkë me atë të Shqipërisë, kanë nënshkruar marrëveshje, të dielën e 27 nëntorit.
Në vigjilje të shënimit të 28 nëntorit, ministrja e Drejtësisë, Albulena haxhiu dhe homologu i saj nga Shqipëria, Ulsi Manja, kanë nënshkruar dy marrëveshje të reja në fushën e drejtësisë së të dy vendeve.
“Nënshkrimi i këtyre marrëveshjeve: ‘Marrëveshja për vendosjen e një bashkëpunimi të ndërsjellët ndërmjet palëve në fushën e sistemit penitenciar’ dhe ‘Marrëveshja për lehtësimin e bashkëpunimit të institucioneve në fushën e mbikëqyrjes së ekzekutimit të dënimeve alternative dhe lirimit me kusht’”.
Kjo është bërë pas zotimit të dhënë për nënshkrimin e të njëjtave nga Ministrat Haxhiu e Manja në Mbledhjen e Tetë të përbashkët të të dy Qeverive, me çka manifestohet edhe më tej simbolika e përbashkimit e bashkëpunimit ndër-vëllazëror e ndër-institucional në mes të Republikës së Kosovës dhe Republikës së Shqipërisë.
Sipas njoftimit të MD-së në Kosovë, nevoja e kësaj shtrirjeje të bashkëpunimit ka ardhur si kërkesë dhe interes i qytetarëve të të dyja vendeve tona.
“Prandaj, zgjerimi e thellimi i këtij bashkëpunimi, përmes nënshkrimit të këtyre marrëveshjeve, i kontribuon interesit tonë, duke qenë se i shërben interesit të tyre”, vijon njoftimi.
Agjenda e Qeverisë së Kosovës për 28 nëntorin
Është Qeveria e Kosovës ajo e cila ka bërë publike agjendën e datës 28 nëntor.
Të hënën, më 28 nëntor në ora 09:00 do të ketë homazhe te busti i heroit kombëtar Gjergj Kastrioti-Skenderbeu, ndërkaq në ora 10:00 homazhe tek varrezat e familjes Jashari në Prekaz.
Ndërkaq, duke filluar nga ora 12:00 e deri në 14:00, në sheshin e Prishtinës do të jetë togu ceremonial i FSK-së.
Po të hënën, më 28 nëntor në ora 17:00 në Muzeun Kombëtar të Kosovës do të ketë ceremoni dhe performancë për rivitalizimin praktik të folklorit muzikor në Kosovë.
Në orën 19:00 pritje e kryeministrit Albin Kurti në mensën “Ramiz Sadiku”.
Më 30 nëntor, në ora 11:00 homazhe te varri i Hasan Prishtinës në Kukës, ndërkaq aktivitetet do të përmbyllen me ndeshje futbolli mes ushtarëve të Kosovës dhe Shqipërisë nga ora 12:00 -13:00 në Kukës.