Kosova ka nënshkruar aplikimin për anëtarësim në Bashkimin Evropian, të mërkurën e 14 dhjetorit.
Krerët e shtetit, presidentja Vjosa Osmani, kryeministri Albin Kurti dhe kryetari i Kuvendit të Kosovës, Glauk Konjufca, kanë marrë pjesë në ceremoninë e nënshkrimit të aplikimit.
Ceremonia është zhvilluar në Kabinetin e Presidentes së Kosovës, pas së cilës, Osmani, Kurti e Konjufca do të deklarohen për media.
Ndryshe, kryeministri i Kosovës, Albin Kurti, gjatë të martës të 13 dhjetorit, në mbledhjen e Qeverisë, ka thënë se Kosova këtë javë do të aplikojë për anëtarësim në Bashkimin Evropian.
“Para një viti në takimin vjetor të këshillit, në kuadër të marrëveshjes për Stabilizim Asociim në Bruksel, bëmë të ditur se këtë vit do të aplikojmë për në BE. Sot në mbledhjen e 112 të qeverisë po bëjmë të ditur se aplikimin për në BE do ta bëjmë këtë javë”, ka deklaruar ai.
Hyrja në BE, sipas Kurtit, është në përputhje me aspiratat e qytetarëve të Kosovës.
Kosova deri më tani ka vetëm një marrëveshje kontraktuale me BE-në, përkatësisht Marrëveshjen e Stabilizim Asocimit.
Nga 27 shtetet anëtare të unionit evropian, pesë prej tyre ende nuk e njohin pavarësinë e Kosovës.
Shtetet mosnjohëse janë, Spanja, Rumania, Qiproja, Greqia dhe Sllovakia.
Nga shtetet e rajonit të Ballkanit Perëndimor, Serbia dhe Mali i Zi janë dy shtetet që kanë bërë më shumë përparim drejt anëtarësimit në bllok, pasi deri më tani kanë hapur disa kapituj në bisedimet për anëtarësim.
Maqedonia e Veriut dhe Shqipëria gjatë këtij viti nisën procesin e bisedimeve, ndërkaq Bosnjë e Hercegovina këtë javë pritet të marrë statusin e vendit kandidat.
Kosova po ashtu është shteti i vetëm që nuk ka liberalizim të vizave me BE-në.