Kosova ka nisur aplikimin e saj për anëtarësim në Këshillin e Evropës, kjo nismë pritet që të fillojë sot (të enjten).
Qeveria e Kosovës përmes një komunikate ka bërë të ditur se kanë miratuar në parim nismën për anëtarësimin e Republikës së Kosovës në organizatën ndërkombëtare “Këshilli i Evropës – Council of Europe”.
Ky vendim i miratuar të enjten, sipas Qeverisë së Kosovës e obligon Ministrinë e Punëve të Jashtme dhe të Diasporës që të zhvillojë të gjitha procedurat për anëtarësim në bazë të legjislacionit në fuqi.
“Qeveria e Republikës së Kosovës ka zhvilluar mbledhje elektronike në të cilën ka miratuar në parim Nismën për anëtarësimin e Republikës së Kosovës në organizatën ndërkombëtare “Këshilli i Evropës – Council of Europe”. Këshilli i Evropës është organizata më e vjetër ndërqeveritare në Evropë, që për qëllim kryesor ka sigurimin e bashkëpunimit dhe unitetit ndërmjet anëtarëve të saj në lëminë e mbrojtjes së të drejtave të njeriut, demokracisë dhe sundimit të ligjit”, thuhet në komunikatën e Qeverisë.
Një aplikim i tillë është paralajmëruar edhe më herët, që Kosova do ta shfrytëzojë këtë mundësi në muajin maj të këtij viti.
Javë më parë Kosova kishte marrë mbështetjen për t’u anëtarësuar në Këshillin e Evropës edhe nga anëtari i Asamblesë së Përgjithshme të Këshillit të Evropës, Knut Abraham.
“Qeveria federale mbështet anëtarësimin e Kosovës në Këshill të Evropës. Është me rëndësi, që për këtë çështje të mbesim në koordinim të ngushtë me partnerët tanë në BE dhe në Këshill të Evropës”, është thënë në përgjigjen e Qeverisë së Gjermanisë”, kishte shkruar ai në Twitter.
Ndryshe, lidhur me një aplikim të mundshëm të Kosovës për anëtarësim në KE, edhe presidentja e Kosovës, Vjosa Osmani, ishte shprehur optimiste. Ajo kishte thënë se Kosova është duke u përgatitur për një gjë të tillë.
Paralajmërimin për aplikimin e Kosovës në KE e kishte bërë edhe Gazetari Michael Martens, i cili të premten e 22 prillit kishte deklaruar se Kosova ‘shumë shpejt’ do të iniciojë procesin e anëtarësimit të plotë në Këshillin e Evropës (KE).
Këshilli i Evropës është një organizatë e shteteve evropiane, e themeluar më pesë maj 1949, për të arritur një bashkim më të madh midis vendeve anëtare mbi bazën e traditave të tyre të përbashkëta të lirisë politike.
Organizata ka 47 shtete anëtare dhe vepron me një buxhet vjetor prej rreth 500 milionë eurosh.