Ministria e Financave ka nënshkruar një marrëveshje granti në vlerë prej 5 milionë eurosh me Bankën Gjermane për Zhvillim (KfW), për financim shtesë të projektit “Zhvillimi i sektorit të energjisë – Faza VII: Përmirësimi i Rrjetit të Transmisionit”.
Sipas Ministrisë, fondet do të përdoren për realizimin e projekteve që synojnë zhvillimin dhe modernizimin e infrastrukturës së transmisionit të energjisë elektrike në Kosovë. Projekti zbatohet nga Operatori i Sistemit, Transmisionit dhe Tregut të Energjisë Elektrike të Kosovës (KOSTT) dhe synon të forcojë rrjetin e transmisionit, të rrisë sigurinë dhe besueshmërinë e furnizimit me energji elektrike, si dhe të avancojë integrimin e tregut energjetik.
Ministri i Financave, Hekuran Murati, ka vlerësuar angazhimin e KOSTT-it në zbatimin e projektit dhe tha se financimi shtesë i siguruar nga Qeveria Gjermane përmes KfW-së do të mundësojë realizimin e investimeve prioritare dhe forcimin e qëndrueshmërisë së sistemit energjetik të vendit.
Nga ana tjetër, drejtori i KfW-së për Kosovë, Moritz Remé, ka theksuar rëndësinë e bashkëpunimit të vazhdueshëm me institucionet e Kosovës dhe rikonfirmoi gatishmërinë e bankës për të mbështetur më tej modernizimin e sektorit energjetik.
Ndërkaq, kryeshefi ekzekutiv i KOSTT-it, Trim Tërnava, ka deklaruar se projektet po realizohen sipas planifikimit dhe se mbështetja shtesë do të krijojë mundësi për modernizimin e mëtejshëm të rrjetit të transmetimit, duke rritur kapacitetet e tij për t’iu përgjigjur zhvillimeve të ardhshme dhe duke përforcuar sigurinë e sistemit elektroenergjetik.
Ministria e Financave mbetet e përkushtuar në sigurimin e financimeve për projekte strategjike që kontribuojnë në forcimin e sigurisë energjetike, zhvillimin e infrastrukturës kritike dhe avancimin e qëndrueshëm të sektorit të energjisë në Kosovë, thuhet në njoftim.