Mbi 1 mijë qytetarë kosovarë dy ditët e kaluara përfunduan të maltretuar e të ndaluar nga autoritetet e Serbisë, derisa përdornin pikat kufitare tokësore të vendit fqinj.
Por, njëri nga ta është akoma i arrestuar në Serbi. Bëhet fjalë për Sadik Durakun nga Gjakova, i cili në këtë valë u arrestua dhe u ndalua me pretendimin që i njëjti kishte kryer krime lufte.
Vëllai i Durakut, për televizionin tregoi që ai po mbahet akoma atje dhe po pritet që procesi gjyqësor të marr epilog.
“Për momentin është në gjykatë, gjyqi ka vazhdu akoma, i ka zgjatë shumë. Për momentin nuk kemi asnjë informacion prej tij tash po presim çka po thojnë prej atje. Gjendja shëndetësore ka lajmëru që është e mirë, terapinë është duke e marr e për momentin mirë është”, ka deklaruar vëllai i Durakut.
Por, dikur ministri i Propagandës në Serbi tash Presidenti i saj, Aleksandër Vuçiq sot deklaroi që janë liruar të gjithë të ndaluarit ndonëse familjarët mohojnë një gjë të tillë.
“Dy ose tre persona u ndaluan për t’u marrë në pyetje dhe të gjithë u liruan. Njëri prej tyre u mor në pyetje sepse ishte në UÇK”, ka deklaruar Vuçiq.
Ndërkohë nga Organizata e Veteranëve të UÇK-së në Has po konsiderojnë që kjo është vetëm arsyetim i Serbisë pasi sipas tyre Sadik Duraku nuk ka qenë fare pjesë e Ushtrisë Çlirimtare të Kosovës.
“Në degën tonë e kemi verifiku, Sadik Duraku nuk ka qenë pjesëtar ose veteran në organizatën tonë. Por ne kemi informacion që gjatë kohës së luftës Sadiku ka qenë në Berlin në Gjermani”, ka deklaruar Xhevdet Thaçi nga OVL e UÇK në Has.
Pos maltretimit të qytetarëve e ndalimit të tyre, Serbia ka ndaluar për rreth 48 orë edhe zv.Drejtorin e Policisë së Kosovës që është nga komuniteti serb, Dejan Jankoviq, i cili u lirua të enjten vonë pasdite.