Raporti ditor i Policisë së Kosovës është i stërmbushur me raste të posedimit të narkotikëve, në shumicën e rasteve të llojit marihuanë.
Nga 11 raste për posedim të narkotikëve, vetëm katër të dyshuar janë dërguar në mbajtje, të tjerët janë liruar në procedurë të rregullt.
Se kanabisi, apo marihuana është duke u përdorur shumë e thonë edhe ekspertët e kësaj fushe. Safet Blakaj nga Instituti “Labyrinth” thotë se shqetësuese është edhe mosha që po e përdor këtë drogë.
“Pra droga që përdoret më së shumti është kanabisi (marihuana), fillimet kur fillojnë me e përdor drogën kanë në nivelin që besoj që nuk mundet me shku më poshtë, dhe kjo është prej të dhënave të vitit të kaluar që ka rënë sakt në moshën 16 vjeçare, pra mosha e fillimit të përdorimit të drogës kjo është mesatarja”, ka thënë Blakaj.
Sipas sociologëve ndër faktorët që kanë ndikuar që mosha e fillimit të konsumimit të drogave të ulet në 16 vjeç është keq-informimi i të rinëjve për rrezikun nga drogat.
“Informimi kur është i tepruar është varfëri, pra është varfëri për informimin e duhur pastaj. Këta informohen por nuk informohen në mënyrë profesionale… Do të ishe mirë që të ketë konktakt më të madh të prindërve me mësimdhënësit, unë mendoj që kjo mungon shumë”, ka thënë sociologu, Kushtrim Bekteshi.
Ndërkohë, Blakaj që thotë se mungon edukimi i të rinjve për drogat, ndërkaq tregon se është shqetësuese rritja e konsumimit të kokainës.
“Po mendohet që është drogë e shtresave të larta që është drogë që nuk shkakton probleme por në terren po del e kundërta. Pra gjërat janë duke shkuar keq sa i përket përdorimit të kokainës”, ka thënë Blakaj.
Ai tregon se për një vit në Kosovë konsumohet sa gjysma e vlerës së duhanit.
Sipas të dhënave të Doganës së Kosovës rreth 200 milionë euro në vit qytetarët shpenzojnë për duhan.
Kurse sipas të dhënave të Policisë së Kosovës në 2022-ën janë trajtuar 808 raste me mbi një mijë të dyshuar. Për trafikimi ishte 271 vepra, për posedim 505 raste, ndërkaq për kultivim të drogave 32 raste.
Ndërkohë vetëm gjatë muajit janar sipas të dhënave të Policisë së Kosovës janë konfiskuar ose sekuestruar 146.6 gram heroinë, 182 gram kokainë, ndërsa sasia e marihuanës shkon në mbi 181 kilogramë.
Sociologu Bekteshi thotë se edhe qendrat për punë sociale po i trajtojnë rastet formalisht, pa përmbajtje e me mungesë profesionale.