Pronari i televizionit “First Chanel”, Valon Maloku ka bërë të ditur se Komisioni i Pavarur i Mediave (KPM), e ka ndërprerë transmetimin televiziv të programit “It’s my home”.
Arsyeja sipas tij, është ndërrimi i skemës programore.
“Sipas vendimit te KPM-se programi Reality show “It’s my home” ndërkrehet menjëherë në transmetimin televiziv. Arsyeja është për ndërrim të skemës programore, që është ndërruar qe 9 vite, dhe jo për arsyet që po kanë qejf portalet”, ka shkruar Maloku në Facebook.
Ndërkaq, në një komunikatë për media, Komisioni i Pavarurur i Mediave (KPM), ka njoftuar se janë duke i përcjellë me vëmendje përmbajtjet e transmetuara në televizionin “First Chanel”.
“Komisioni i Pavarur i Mediave (KPM) ka përcjell me vëmendje përmbajtjet e transmetuara së fundi në media, respektivisht televizionin First Chanel. Nisur nga obligimet ligjore si rregullator dhe shqetësimet e publikut që kanë të bëjnë me imazhet e paraqitura në televizionin First Chanel, KPM ka iniciuar monitorimin dhe vlerësimin e përmbajtjeve të shfaqura, të cilat mund të bien ndesh me legjislacionin e KPM-së”, thuhet në noftimin nga KPM-ja.
Po ashtu, KPM-ja ka kërkuar nga ofruesit e shërbimeve mediale audio-vizuele që të kenë kujdes gjatë transmetimit të programeve dhe emisioneve të drejtpërdrejta pavarësisht formatit të tyre, dhe të ndërmarrin veprime konkrete për të mënjanuar manifestimin e dhunës dhe përdorimin e gjuhës vulgare dhe ofenduese.
Në këtë “reality show”, i titulluar “It’s my home”, i cili ka filluar së fundmi në Kosovë, kishte filluar një debat, mes dy banorëve, dhe debati përfunoi kur njëri nga banorët ka goditur me këpucë banoren tjetër. Dhe e njëjta ishte larguar duke qarë me zë të lartë.
Ndërsa, nuk është ky i vetmi rast ky që shfaqte dhunë fizike dhe psikike në televizion, pasi ka shumë video që qarkullojnë në rrjete sociale, ku shfaqin banorët duke bërtitur me njëri-tjetrin.
Ndërkaq, emisioni është mjaft i shikuar, rreth 10 mijë njerëz e shikojnë gjatë transmetimit live.