Komisioni Qendror i Zgjedhjeve, në mbledhjen e mbajtur të hënën, ka miratuar shkurtimin e afateve të rregullta zgjedhore që lidhet edhe me votimin e largimit të kryetarëve nga funksioni në katër komunat veriore, Leposaviq, Zubin Potok, Zveçan dhe Mitrovicë e Veriut.
Votimi për këtë çështje përfshinte edhe disa plane dhe rregulloret të cilat janë miratuar me një shumicë votash.
Miratimi i shkurtimit të afateve të rregullta është bërë me 9 vota për dhe dy abstenim.
Tashmë është miratuar edhe buxheti i ndarë për organizimin e procesit të votimit për shkarkimin e kryetarëve në komunat veriore.
KQZ-ja ka bërë të ditur se janë ndarë 233.204 euro.
Po ashtu, Plani i aktiviteteve, Plani i informimit publik dhe Plani i buxhetit për procesin e votimit për largimin e kryetarëve janë miratuar me nëntë vota për dhe dy abstenim.
Ndërkaq, plotësimi i ndryshimit të Rregullores për pranimin e stafit të përkohshëm është miratuar me 11 vota për.
Javën e kaluar, më 8 mars, KQZ-ja, pasi kishte bërë verifikimin e nënshkrimeve të mbledhura në peticionet për shkarkimin e kryetarëve në veri, vendosi për datën e mbajtjes së votimit, që u propozua nga sekretariati.
Më 21 prill votohet për shkarkimin e kryetarëve në veri
Me tetë vota për dhe dy abstenime, anëtarët e Komisionit votuan rekomandimin që më 21 prill të votohet për apo kundër largimit të katër kryetarëve shqiptarë në komunat në veri të Kosovës.