Komisioni Qendror i Zgjedhjeve këtë të hënë ka miratuar dizajnin dhe përmbajtjen e fletëvotimit që do të përdoret në vendvotimet brenda Kosovës për zgjedhjet e parakohshme parlamentare të 28 dhjetorit 2025.
Pas miratimit, kryesuesi Kreshnik Radoniqi njoftoi se ndaj këtij vendimi palët e interesuara mund të paraqesin ankesë në Panelin Zgjedhor për Ankesa dhe Parashtresa.
Vendimi i sotëm vjen pas tërheqjes së shortit për renditjen e subjekteve politike në fletëvotim.
Sipas KQZ-së, fletëvotimi përmban gjithsej 24 subjekte, 18 parti politike, 3 koalicione, 2 iniciativa qytetare dhe 1 kandidat të pavarur.
Në mbledhjen e kaluar, KQZ kishte miratuar edhe fletëvotimin për votimin jashtë Kosovës, i cili është i njëjtë në përmbajtje dhe dizajn me atë që do të përdoret brenda vendit.
