Komisioni Qendror i Zgjedhjeve ka bërë të ditur se ka miratuar regjistrimin e një subjekti të ri politik në Kosovë.
“Partia Qytetare për Mirëqenie Sociale” (PQMS), është futur zyrtarisht në regjistrin e partive politike me numrin rendor 53, njofton Dukagjini.
Vendimi është marrë në mbledhjen e 35-të të këtij viti të KQZ-së, e cila është udhëhequr nga kryesuesi Kreshnik Radoniqi.
Sipas njoftimit të KQZ-së, iniciativa qytetare e udhëhequr nga Sali Salihu kishte dorëzuar aplikacionin për regjistrim më 17 mars 2026, së bashku me dokumentacionin e plotë të kërkuar, përfshirë statutin, programin politik, aktin e themelimit, simbolin e partisë, raportin financiar, nënshkrimet e përkrahësve dhe dëshminë e pagesës së taksës së regjistrimit.
Pas shqyrtimit dhe plotësimeve të kërkuara, dokumentacioni është vënë në shqyrtim publik nga 1 deri më 7 prill 2026, periudhë gjatë së cilës nuk është pranuar asnjë ankesë. Në bazë të këtij procesi, KQZ ka vendosur regjistrimin e PQMS si parti politike në Kosovë.
Në të njëjtën mbledhje, KQZ mori gjithashtu vendim për emërimin e komisionit të pranimit për pozitën e Drejtorit të Sekretariatit të institucionit.