Të mërkurën e 27 korrikut, kryetari i Partisë Demokratike të Kosovës(PDK), Memli Krasniqi, ka vizituar komunën e Skenderajt në kuadër të vizitave nëpër komunat e Kosovës.
Përmes një postimi në Facebook, Krasniqi ka thënë se një pamje e re dhe moderne ka rrethuar sheshin e qytetit në Skënderaj.
“Pamje e re dhe moderne për sheshin e qytetit në Skënderaj. Parking nëntokësor, park në qendër të qytetit, rivitalizim i të gjitha shesheve kryesore dhe rrugëve të Skënderajt, me buxhet tërësisht vetanak të komunës dhe pa asnjë mbështetje nga qeveria aktuale qendrore”, ka shkruar Krasniqi në Facebook.
Ai është takuar me kryetarin e kësaj komune, Fadil Nura, takim në të cilin ka thënë se është e pakuptimtë se si Qeveria e Kosovës po i bllokon investimet kapitale në komuna, duke i diskriminuar qytetarët e vendit, duke specifikuar kështu mungesën e ujit të pijes.
“Projekti i vetëm i nivelit qendror, që ka qenë në procedurat buxhetore të këtij viti për sigurimin e ujit të pijes për qytetarët e Komunës së Skemderajt, është bllokuar nga qeveria qendrore. Ky diskriminim ndaj qytetarëve duhet të marr fund sa më parë”, ka shtuar Krasniqi.
Krasniqi ndër të tjera ka theksuar se është i inkurajuar nga energjia dhe dinamika e punës së Kryetarit Nura, nënkryetarit Lushtaku dhe ekipit të tyre.
Ai ka thënë se do të jetë afër në secilin hap në avancimin e qeverisjes lokale të kryetarit Nura.