Kreu i PDK-së, Memli Krasniqi, pas takimit me Albin Kurtin, tha qartë se zhbllokimi i situatës për konstituimin e Kuvendit varet nga ndryshimi i kandidatit për kryeparlamentar.
“Për PDK-në është me rëndësi që sa më shpejt të zhbllokohet kjo situatë dhe të hyhet në afatet kushtetuese për zgjedhjen e Qeverisë. Privilegji kushtetues i takon partisë së parë për të propozuar emrin për kryeparlamentar. Kurtit i thashë që do të ishte mirë të mendonte për kandidatura të tjera”, ka deklaruar Krasniqi.
Ai theksoi se PDK-ja nuk ka qenë bllokuese dhe as nuk ia zgjedh kryetarin e Kuvendit partisë së parë, por kërkon një figurë të pranueshme.
“Ne nuk kemi marrëveshje politike. Po themi: ejani që ta votojmë një figurë që mund të jetë e pranueshme,” shtoi ai.
Sipas Krasniqit, nëse Kurti dëshiron të zhbllokojë Kuvendin, duhet “që sot” të ndryshojë emrin për kryetar Kuvendi. Përndryshe, ai e sheh të kundërtën.
“Nuk më tha që ka ndryshim për emrin e Albulena Haxhiut, por unë besoj fuqishëm se nëse dëshiron zhbllokim, ai duhet të ndryshojë kandidatin,” u shpreh lideri i PDK-së.
Sa i përket koalicionit, Krasniqi ishte i qartë: “Jo more, çfarë… Nuk ka asgjë për këtë punë, qëndrimet janë të qarta.”
Takimi i Kurtit dhe Krasniqit u zhvillua vetëm pak orë para seancës së nëntë konstituive të Kuvendit, që ka dështuar tetë herë për shkak të mungesës së votave për Albulena Haxhiun.