Kryetari i Partisë Demokratike të Kosovës (PDK), Memli Krasniqi e ka ditën e sotme të hidhur sot pasi Kosova dështoi të jetë në pjesë e agjendës së mbledhjes së Komitetit të Ministrave në Strasburg.
Në një postim në Facebook, Krasniqi ka thënë se po “humbet mbështetja nga ndërkombëtarët” në vend se të konkretizohet një sukses që do të forconte demokracinë, sundimin e ligjit dhe shtetësinë.
“Kjo Qeveri, ky pushtet, pa përjashtuar asnjë nga përgjegjësit e institucioneve shtetërore, dështoi ta finalizojë një punë thuajse të kryer. Mbështetjen e ktheu në injorim. Besimin në zhgënjim. E të ardhmen e sigurt të qytetarëve tanë – e shndërroi në faturë të lartë politike që duhet ta paguajnë po ata”, ka shkruar Krasniqi.
Tutje i pari i PDK-së ka thënë se qasja në Gjykatën Evropiane të të Drejtave të Njeriut në Strasburg do të ishte përfitim i madh për qytetarët dhe Kosovën.
“Pas përjashtimit të Rusisë nga Këshilli i Evropës në mars të vitit 2022, si PDK kemi insistuar menjëherë që Kosova të nis procedurat për t’u bërë pjesë e kësaj organizate, duke e dhënë mbështetjen tonë të parezervë në çdo hap të këtij procesi. Fatkeqësisht, sot, dy vite më vonë, kur gjithçka ishte gati pasi kishim siguruar mbështetjen e nevojshme, për shkak të paaftësisë së plotë dhe papërgjegjësisë së skajshme të Qeverisë sonë, edhe kjo mundësi u humb. Akoma më keq, një rast i tillë nuk e dijmë se kur do të na paraqitet prapë”, ka shtuar ai.
Ai ka theksuar se shkuarja në zgjedhje të parakohshme është e domosdoshme pasi sipas tij këtij pushteti sot zyrtarisht i ka humbur legjitimiteti.
“Për PDK-në, rrugëtimi drejt integrimit evropian të shtetit tonë është i paalternativë. Përkushtimi ynë për drejtësi, demokraci dhe të drejta të plota për çdo qytetar të Kosovës mbetet i palëkundur. Prandaj, shkuarja në zgjedhje të parakohshme, krijimi i një Qeverie të re, kredibile, kompetente dhe të përgjegjshme, që e heqë Kosovën nga izolimi dhe e orienton nga integrimi i sigurt euro-atlantik – është e domosdoshme. Sot, edhe zyrtarisht ky pushtet e ka humbur legjitimitetin. Shteti ka nevojë për qytetarët dhe ata duhet ta thonë fjalën e tyre”, ka theksuar ai.
Sot, Kosova ka dështuar të jetë pjesë e agjendës së mbledhjes së Komitetit të Ministrave në Strasburg.
Kryesuesja e deritanishme e Komitetit të Ministrave të Këshillit të Evropës, Dominique Hasler, tha se ky komitet po shqyrton se si të procedojë për pranimin e Kosovës në këtë organizatë.