Ministri i Administrimit të Pushtetit Lokal, Elbert Krasniqi, ka reaguar pas lëshimit të alarmit në veri.
Krasniqi, përmes një postimi në Facebook, ka thënë se dikasteri i tij së bashku me institucionet qendrore ka për obligim t’i mbështesë plotësisht kryetarët e rinj të katër komunave veriore, Mitrovicë e Veriut, Zubin Potok, Zveçan dhe Leposaviq, në përmbushjen e obligimeve ligjore dhe kushtetuese.
“Dje u betuan edhe kryetarët e komunës së Zveçanit, Zubin Potokut dhe Leposaviqit. Për ta sot është dita e parë e punës. Punë dhe shërbim të cilin duhet ta kryejnë nga zyrat e Komunave, bashkë me shërbyesit civilë. Ata janë zotuar që do t’i shërbejnë të gjithë qytetarëve pa dallim. Si Ministri dhe institucione qendrore japim mbështetjen tonë të plotë në përmbushjen e obligimeve kushtetuese dhe ligjore të kryetarëve të rinj. E si institucione qendrore e kemi obligim që t’ua sigurojmë dhe mundësojmë përmbushjen e këtyre obligimeve”, ka shkruar Krasniqi.
Ndryshe, të enjten janë betuar kryetarët e komunave të Zveçanit, Zubin Potokut dhe Leposaviqit.
Ndërkaq, sot është lëshuar alarmi në veri, ku para ndërtesave të këtyre komunave janë mbledhur qytetarët serbë për të kundërshtuar futjen e kryetarëve të rinj në këto objekte.
Po ashtu, edhe në Zveçan ka pasur edhe përleshje në mes të serbëve të mbledhur dhe Policisë të Kosovës, ku janë dëgjuar edhe të shtëna armësh.